Е.К.Федоров аатынан Хорула орто оскуолатыгар ахсынньы 15 күнүгэр Егор Кононович Федоров төрөөбүтэ 100 сылын туоларыгар аналлаах түмүктүүр үөрүүлээх тэрээһинэ буолан ааста. Биһиги оскуолабыт Хорула нэһилиэгиттэн бастакы үрдүк анал үөрэхтээх учуутал, общественник, спорт пропагандиһа, агитатор, оскуолаҕа директорынан таһаарыылаахтык үлэлии сылдьан эдэр сааһыгар дьону быыһыы сылдьан самолет саахалыгар олохтон барбыт Федоров Егор Кононович аатын 2004 сыл сэтинньи 18 күнүттэн Саха республикатын президенин (Вячеслав Штыров) 1788 ньүөмэрдээх ыйааҕынан киэн тутта сүгэр. Бу үөрүүлээх тэрээһиҥҥэ Е.К. Федоров бииргэ төрөөбүт быраата «Гражданскай килбиэн» бэлиэ хаһаайына, Өрөспүүбүлүкэ Ытык Сүбэтин бочуоттаах кырдьаҕаһа, Мэҥэ Хаҥалас улууһун, Бэдьимэ нэһилиэгин бочуоттаах гражданина Федоров Дмитрий Кононович, оҕолоро үлэ бэтэрээнэ Анатолий Егорович, Саха Өрөспүүбүлүкэтин үөрэҕириитин туйгуна, Учууталлар учууталлара Евгений Егорович, Үлэ бэтэрээнэ Розалия Егоровна, Ньурба улууһун баһылыга Иннокентьев Алексей Михайлович, Ньурба улууһун үөрэҕирии управлениетын начальнигын солбуйааччыта Иванов Николай Александрович, Дьокуускай куоракка Хорула түмсүү салайааччыта, Саха Өрөспүүбүлүкэтин үөрэҕириитин туйгуна Иванов Юрий Наумович, меценат, Хорула оскуолатын 1983 с. выпускнига Никифоров Андрей Семенович уо.д.а. кыттыыны ыллылар.
Үбүлүөйдээх тэрээһин учууталлар уонна уһуйаан иитээччилэрин маастар кылаастарынан, аһаҕас уруоктарынан саҕаланна. Өҥөлдьө оскуолатын математика уонна информатика учуутала Павлова Д.Н. маастар кылаас ыытта уонна оҕолорго консультация биэрдэ. Бу тэрээһин чэрчитинэн улуус таһымнаах “Федоров ааҕыыларыгар” үөрэх тэрилтэтин салайааччыларын, учууталлар уонна уһуйаан иитээччилэрин, кылаас салайааччыларын, төрөппүттэр уонна үөрэнээччилэр секциялара үлэлээтилэр. Ааҕыыларга улуус оскуолаларыттан (Хатыы, Өҥөлдьө, Күндээдэ, Чуукаар, Сүлэ, Акана, Марха, Хорула, Ньурба, Антоновка, Ньурбачаан, Чкалов) уонна оҕо уһуйааныттан (МБДОУ ЦРР д/с “Ромашка”, МБДОУ ЦРР д/с “Кэскил”, МБДОУ “Туллукчаана” с .Сайылык) кэлэн кыттыыны ыллылар. Үөрэнээччилэр секцияларыгар элбэх оҕо кыттыбытынан саастарынан арааран икки секция үлэлээтэ.
1 үөрэнээччилэр секцияларыгар сүрүн экспердынан Саха Өрөспүүбүлүкэтин үөрэҕириитин туйгуна Федорова В.Д., 2 үөрэнээччилэр секциялыгар сүрүн экспердынан инновационнай методическай киинин методиһа Лосотова О.В., педагогтар уонна салайааччылар секцияларыгар сүрүн экспердынан Ньурба улууһун үөрэҕирии управлениетын инновационнай методическай киинин салайааччыта Спиридонова У.Е.,, төрөппүттэр секцияларыгар сүрүн экспердынан Ньурбатааҕы Оҕону эбии үөрэхтээһин киинин педагога Егорова М.С., кылаас салайааччыларын секциятыгар сүрүн экспердынан Ньурба улууһун үөрэҕирии управлениетын иитии уонна эбии үөрэхтээһин отделын специалиһа Захарова А.Н. үлэлээтилэр.